ສະຫະພັນກຳມະບານ ສະເໜີລັດຖະບານພິຈາລະນາຂຶ້ນຄ່າແຮງຂັ້ນຕ່ຳ ຈາກ 900.000 ກີບ ເປັນ 1.200.000 ກີບຕໍ່ເດືອນ
ອີງຕາມການລາຍງານຂອງໜັງສືພິມ ວຽງຈັນໃຫມ່ສພບັບວັນທີ5 ມັງກອນ2018 ໃຫ້ຮູ້ວ່າ: ສູນກາງສະຫະພັນກຳມະບານລາວ ຖືເປັນອົງການຈັດຕັ້ງໜຶ່ງທີ່ສຳຄັນຂອງພາກລັດ ມີໜ້າທີ່ ແລະ ພາລະບົດບາດໃນການປົກປ້ອງສິດ ແລະ ຜົນປະໂຫຍດອັນຊອບທຳຂອງກຳມະກອນ ຊາວຜູ້ອອກແຮງງານ ປັດຈຸບັນ ລະບົບການຈັດຕັ້ງຂອງສະຫະພັນກຳມະບານລາວ ມີ 18 ສະຫະພັນ ກຳມະບານແຂວງ ແລະ ນະຄອນຫຼວງ 38 ສະຫະພັນກຳມະບານ ກະຊວງ ແລະ ອົງການ 148 ສະຫະພັນກຳມະບານເມືອງ 3.974 ກຳມະບານຮາກຖານ ໃນນີ້ຂະຫຍາຍໃໝ່ 217 ຮາກຖານ ມີ 7.703 ໜ່ວຍກຳມະບານ ຂະຫຍາຍໃໝ່ 466 ໜ່ວຍ ເຮັດໃຫ້ທົ່ວປະເທດມີສະມາຊິກກຳມະບານທັງໝົດ 214.168 ສະຫາຍ ຍິງ 97.316 ສະຫາຍ ທຽບໃສ່ປີ 2016 ເພີ່ມຂຶ້ນ 3,22%.
ສູນກາງສະຫະພັນກຳມະບານລາວ ໄດ້ເອົາໃຈໃສ່ເປັນພິເສດ ໃນການປະຕິບັດວຽກງານປົກປ້ອງສິດ ແລະ ຜົນປະໂຫຍດອັນຊອບທຳຂອງຜູ້ອອກແຮງງານ ໂດຍກຳມະບານແຕ່ລະຂັ້ນໄດ້ເຂົ້າຮ່ວມປະກອບຄຳເຫັນໃສ່ບັນດານິຕິກຳຕ່າງໆ ທີ່ກ່ຽວຂ້ອງກັບການປົກປ້ອງສິດ ແລະ ຜົນປະໂຫຍດຂອງກຳມະບານ ກຳມະກອນ ແລະ ຊາວຜູ້ອອກແຮງງານ ຊຸກຍູ້ ແລະ ນຳພາສ້າງສັນຍາແຮງງານລວມໝູ່ໄດ້ 31 ແຫ່ງ (ເຮັດໃຫ້ທົ່ວປະເທດມີສັນຍາແຮງງານລວມໝູ່ທັງໝົດ 521 ແຫ່ງ) ສັນຍາແຮງງານບຸກຄົນ 5.699 ຄົນ ຮັບຄຳຮ້ອງທຸກ ແລະ ໄກ່ເກ່ຍແກ້ໄຂຂໍ້ຂັດແຍ່ງແຮງງານ 75 ສະບັບ ທວງເງິນຄ່າແຮງໃຫ້ກຳມະກອນ 325 ຄົນ ເປັນເງິນກວ່າ 500 ລ້ານກີບ ສືບຕໍ່ຂຶ້ນທະບຽນກຳມະກອນໄດ້ 7.972 ຄົນ ຍິງ 3.471 ຄົນ ອັນເຮັດໃຫ້ທົ່ວປະເທດມີກຳມະກອນຂຶ້ນທະບຽນແລ້ວ ຈຳນວນ 61.557 ຄົນ.
ພ້ອມດຽວກັນນັ້ນ ສູນກາງສະຫະພັນກຳມະບານ ຍັງເປັນເຈົ້າການສະເໜີໃຫ້ຄະນະກຳມະການ 3 ຝ່າຍ ພິຈາລະນາ ແລະ ນຳສະເໜີໃຫ້ລັດຖະບານພິຈາລະນາອະນຸມັດຂຶ້ນຄ່າແຮງຂັ້ນຕ່ຳ ໃຫ້ແກ່ຜູ້ອອກແຮງງານໃນຂົງເຂດວິສາຫະກິດຈາກ 900.000 ກີບ/ເດືອນ ເປັນ 1.200.000 ກີບ/ເດືອນ (ປັດຈຸບັນການສະເໜີດັ່ງກ່າວ ພວມຢູ່ໃນຂັ້ນຕອນພິຈາລະນາຂອງລັດຖະບານ) ສູນກາງສະຫະພັນກຳມະບານ ໄດ້ເປີດນຳໃຊ້ເບີໂທລະສັບສາຍດ່ວນ 1512 ນັບແຕ່ເດືອນ ກໍລະກົດ 2017 ເປັນຕົ້ນມາ ເພື່ອເປີດໂອກາດໃຫ້ຊາວຜູ້ອອກແຮງງານໄດ້ສອບຖາມບັນຫາຕ່າງໆກ່ຽວກັບບັນຫາແຮງງານ.
ທີ່ມາ: laoupdate
Post a Comment